Тэрмін здачы Нацыянальнага стадыёна перанеслі
Нацыянальны стадыён у Мінску / blizko.by
Тэрмін здачы Нацыянальнага стадыёна перанеслі. Адпаведны ўказ Аляксандра Лукашэнкі з'явіўся на Нацыянальным прававым інтэрнэт-партале.
Стадыён, які будуюць з дапамогай кітайцаў, планавалі здаць да 31 снежня 2024 года. Летась у кастрычніку на ім нават выпрабоўвалі падсветку.
Цяпер тэрміны здачы перанеслі, але канкрэтную дату не называюць. Праўда, з дакумента вынікае, што інфраструктура вакол стадыёна, якую робяць за кошт беларускага боку, павінна быць гатовая да 1 кастрычніка 2025 года.
На Нацыянальным стадыёне планавалася праводзіць матчы футбольнай зборнай Беларусі і еўракубкавыя турніры. Але з 2022 года беларускім клубам і зборнай забаранілі праводзіць міжнародныя гульні ў краіне.
Беларуская федэрацыя футбола планавала правесці на новай арэне фінал Кубка Беларусі. Ён павінен адбыцца ў траўні. Таксама на гэтай арэне на 10 чэрвеня быў запланаваны спарынг зборных Беларусі і Расіі. Мяркуючы па ўсім, правесці іх давядзецца на іншых стадыёнах.
