Топ-5: навіны 20 красавіка
Слухаць цалкам:
Чыслаў: Фігурантаў справы Белага легіёна за кратамі "накачваюць" псіхатропамі
Фігурантаў справы “Белага легіёна” жорстка катуюць за кратамі, каб выбіць патрэбныя паказанні. Акрамя таго, з той жа мэтай, маладых людзей прымушаюць ужываць псіхатропы. Пра гэта ў інтэрв’ю Еўрарадыё распавёў стваральнік “Белага Легіёна” Сяргей Чыслаў.
Па яго словах, усіх фігурантаў справы “Белага легіёна” ужо цяпер варта прызнаць палітвязнямі.
20 красавіка Аляксандр Лукашэнка сустрэўся ў Мінску з губернатарам Ніжагародскай вобласці Расіі Валерыем Шанцавым. Кіраўнік Беларусі выказаўся на тэму геапалітыкі.
Па яго словах, Беларусь не збіраецца разварочвацца ў бок Захаду, бо і так выдатна разумее сваё месца.
Суд Цэнтральнага раёна Мінска адхіліў іск гісторыка Ігара Кузняцова да газеты "Коммунист Беларуси" і яе аўтара Андрэя Лазуткіна.
Ігар Кузняцоў ужо шмат гадоў даказвае, што расстрэлы ў Курапатах — справа рук супрацоўнікаў НКУС, і шукае іншыя месцы сталінскіх рэпрэсій.
У сваю чаргу, камуністы незадаволеныя пазіцыяй гісторыка: з пачатку 1990-х яны спрабуюць даказаць, што ў Курапатах пахаваныя ахвяры нацыстаў, а тагачасныя чэкісты не маюць дачынення да расстрэлаў.
Расійская гімнастка Марыя Сюльгіна, якая сарвалася ў мінскім цырку, не памятае, што з ёй здарылася на сцэне. Пра гэта артыстка распавяла ў каментары Еўрарадыё.
Пры гэтым, па словах гімнасткі як толькі зарастуць косткі ў яе зламанай руцэ, яна адразу вернецца на сцэну і паўторыць падобны трук без страхоўкі.
23 красавіка прадстаўнікі Беларусі на "Еўрабачанні-2017" гурт Naviband граюць у мінскім Палацы прафсаюзаў апошні канцэрт перад паездкай на конкурс.
А ў чацвер у Белтэлерадыёкампаніі, якая прадзюсуе выступ гурта на "Еўрабачанні", музыкі распавялі пра гатоўнасць да выступу ў Кіеве і раскрылі некаторыя падрабязнасці падрыхтоўкі да конкурсу.
