У бабруйскую школу, якую адкрываў Лукашэнка, тэрмінова патрабуюцца настаўнікі
Школу пабудавалі, а настаўнікаў не набралі? / president.gov.by
"Тэрмінова патрабуюцца настаўнікі ў ДУА "Сярэдняя школа № 35", — такая аб'ява з'явілася 5 верасня ў інстаграме пошукавіка вакансій "Праца ў Бабруйску". Гэта тая самая школа, на адкрыцці якой 1 верасня прысутнічаў Аляксандр Лукашэнка.
Згодна з аб'явай, ва ўстанове адукацыі чакаюць настаўнікаў пачатковых класаў, рускай мовы і літаратуры, французскай, англійскай і нямецкай моў, выкладчыкаў фізікі і біялогіі, настаўнікаў музыкі і выяўленчага мастацтва.
Еўрарадыё не знайшло кантактнага нумара адміністрацыі — школа, як відаць, яшчэ не абзавялася сайтам, а нумара дырэктара не ведаюць нават у даведачнай гарадскіх тэлефонаў. З пытаннем, чаму ў новай школе не стае настаўнікаў, мы звярнуліся да начальніцы ўпраўлення па адукацыі Бабруйскага гарвыканкама Алены Лісіцы. Яна адмаўляецца каментаваць сітуацыю, спасылаючыся на тое, што не бачыць пасведчання карэспандэнта.
— І ўвогуле, наколькі правераная ваша інфармацыя? У нас праблем ніякіх няма па сутнасці. Так што на цяперашні момант не адкажу на гэтае пытанне, — сыходзіць ад непасрэднага адказу начальніца ўпраўлення.
Тады мы патэлефанавалі па пазначаным у аб'яве нумары нейкай Наталлі Міхайлаўне. Пытаемся ў яе, якіх яшчэ настаўнікаў не стае ў школе? Але і гэтая жанчына не мае асаблівага жадання размаўляць.
— Мы не даём каментароў. Калі вы бачыце аб'яву, значыць, вы бачыце, якіх настаўнікаў не стае.
Але як будзе праходзіць навучальны працэс без выкладчыкаў?
— Мы не даём ніякіх каментароў.
"Гэта вялікі падарунак і краіне, і гораду, — заявіў Лукашэнка на адкрыцці школы №35. — Мы ж планавалі адкрыць гэтую школу яшчэ толькі ў снежні. Але і будаўнікі, і мясцовыя ўлады вельмі стараліся завяршыць работы менавіта да 1 верасня".
