У Грэцыі запалілі агонь летняй Алімпіяды
Агонь ў старажытнай Алімпіі / Reuters
16 красавіка ў Грэцыі ў старажытнай Алімпіі на традыцыйнай цырымоніі запалілі агонь летняй Алімпіяды. Гульні стартуюць у Парыжы 26 ліпеня 2024 года.
Як паведамляе Reuters, было хмарнае надвор'е, таму для запальвання агню не атрымалася выкарыстаць люстэрка — скарысталіся запасной паходняй (яе запалілі напярэдадні, калі было сонечнае надвор'е). Такім чынам ад сённяшняга дня пачынаецца эстафета ў Грэцыі і Францыі. Яе кульмінацыяй стане запальванне алімпійскага агню ў французскай сталіцы на цырымоніі адкрыцця (спартсменам з Беларусі і Расіі забаранілі ў ёй удзельнічаць).
Парыж прыме летнія Алімпійскія Гульні ў трэці раз (раней — у 1900 і 1924 гадах).
Прэзідэнт Міжнароднага алімпійскага камітэта Томас Бах на цырымоніі гаварыў, што мы жывем у цяжкія часы, падчас войнаў і канфліктаў, а Алімпіяда нас збліжае, аб'ядноўвае і дае надзею.
