У Мінску відавочцы выратавалі жанчыну, якая выпадкова ўпала ў ваду
У Мінску відавочцы выратавалі жанчыну, якая танула на Сляпанскім вадасховішчы. Гэта здарылася раніцай у аўторак насупраць дома нумар 55 па вуліцы Ваньковіча. Інфармацыя, што ў вадзе тоне чалавек, паступіла ў МНС. Але да прыезду выратавальнікаў жанчыне дапамаглі відавочцы.
Побач апынуліся рабочы-фасадчык і машыніст пагрузчыка, якія працавалі на новабудоўлі на вуліцы Філімонава. Пацярпелая пасля агляду брыгада хуткай дапамогі шпіталізаваная з агульным пераахаладжэннем.
Жанчына працуе абходчыкам гідратэхнічных збудаванняў. У той дзень яна выконвала працы па прыборцы канала, паслізнулася і ўпала ў ваду, перадае прэс-служба МНС.
