У Нідэрландах мужчыны выказалі падтрымку жанчынам Кёльна, надзеўшы міні-спадніцы
У суботу, 16 студзеня, каля 400 мужчынаў прайшліся па вуліцах Амстэрдама ў кароткіх спадніцах, каб падтрымаць ахвяраў сэксуальных дамаганняў у Кёльне.
Арганізатары акцыі на сваёй старонцы ў Facebook заявілі, што занадта часта ў гвалце над жанчынамі абвінавачваюць саміх ахвяраў.
“Кароткія спадніцы — не падстава для гвалту. Таму мы змяняем звыклыя ролі і праслаўляем спадніцы і свабоду, якую яны ўвасабляюць. Мы дэманструем нашыя валасатыя калені ў імя свабоднага грамадства, у якім жанчыны могуць вольна хадзіць па вуліцах у любы час дня і ночы”, — паведамляюць арганізатары.
Фота: broadly.vice.com/Beulah Devaney
Фота са старонкі facebook Mieke van Hooijdonk
Акцыя ладзілася, каб падтрымаць ахвяраў нападаў у Кёльне. Там у навагоднюю ноч каля 500 жанчын сутыкнуліся з сэксуальнымі дамаганні з боку мігрантаў. Апошнім часам падобнае здаралася і ў іншых гарадах Еўрасаюза.
