Гэты агульны “слоік” — не кішэня стваральніка “Новай Беларусі” Паўла Лібера, з якой ён вылучае грошы тым, каму захоча. Тыя, хто скінуўся, могуць прапанаваць для рэалізацыі свой праект, могуць прагаласаваць за той праект, які нехта ўжо прапанаваў. А могуць далучыцца да якой-небудзь ініцыятывы.
— Гэта трэнажор дэмакратыі. У вас ёсць грошы, якія ўсё роўна будуць спісаныя. Але вы можаце сваёй воляй накіраваць іх на нейкія беларускія ініцыятывы. І дзякуючы гэтаму ўплываць на праект: далучацца да каманды, пакідаць каментары, падабайкі і антыпадабайкі.
Здаецца, што 1,5% ад падаткаў — невялічкая сума ад аднаго чалавека. Але калі скідваецца тысяча чалавек, атрымліваецца неблагая гісторыя. Летась толькі ў Польшчы такім чынам беларусы сабралі каля 30 тысяч еўра.
Удзельнічаць у галасаванні могуць толькі тыя, хто перанакіраваў частку сваіх падаткаў на “Новую Беларусь”. Але паглядзець, што адбываецца, карысна ўсім — гэта добры спосаб прынамсі паназіраць за тым, як у здаровым грамадстве могуць размяркоўвацца падаткі.
Марыя нагадвае, што “старая” Беларусь прызнала “Новую Беларусь” экстрэмісцкім фармаваннем. Таму калі вы знаходзіцеся ў Беларусі — не спампоўвайце прыкладанне. А калі вельмі хочацца сачыць, як ідзе галасаванне, лепей зайдзіце на сайт (а пасля на ўсялякі выпадак пачысціце гісторыю браузера).
І што далей?
Мінулым годам беларусам Польшчы і Літвы так спадабалася размяркоўваць свае падаткі, што беларусам у іншых краінах таксама захацелася паспрабаваць. Так у праекта з’явіўся раздзел Global. Беларусы з усяго свету могуць скінуцца па 35 еўра тут і пасля на сабраныя грошы рэалізаваць нейкі праект. Каб ніякай дыяспары не было крыўдна, праект павінны быць анлайнавы. Да таго ж, анлайн праектам змогуць карыстацца і беларусы ўнутры Беларусі.
Унёсак можна скінуць і ў слоік краінавых суполак Польшчы і Літвы. Такую опцыю зрабілі для тых, хто не падае дэкларацыі ў гэтых краінах, але хоча паўплываць на працэс галасавання ці пазмагацца за рэалізацыю ўласнай ідэі, тлумачыць Марыя.
Ідэі можна падаваць да лістапада. Кожную правераць юрысты. Калі прапанова не адпавядае заканадаўству краінаў, у якіх беларусы плацілі падаткі, яе давядзецца зняць.
— Летась была папулярнай ідэя: набыць кавалак зямлі, на якім мы змаглі б будаваць “Новую Беларусь”. Ну а што, добрая ідэя? Але, натуральна, на такі праект мы не зможам выдаткаваць грошы, бо ні літоўскі, ні польскі ўрад гэтага не ўхваліць, — смяецца Марыя.
Сёлета самыя гарачыя абмеркаванні ідуць вакол прапановы аплаціць адпачынак Святлане Ціханоўскай і яе дзеткам. Няма чалавека, які б не меў меркавання па гэтым праекце — ён ці моцна падабаецца, ці моцна не падабаецца.
Дарэчы, калі ідэя вам моцна не падабаецца, можаце паставіць антыпадабайку. Праекты з адмоўным рэйтынгам будуць дыскваліфікаваныя.
