Вызвалілі беларуса, затрыманага пры падачы заявы на міжнародную абарону
![Дакументы Аляксандра С.](/sites/default/files/styles/gallery_main/public/2024-08/bielarus-1508.png.webp?itok=I-69n7GK)
Дакументы Аляксандра С. / Белсат
Польскія памежнікі адпусцілі беларуса Аляксандра С., затрыманага пры падачы заявы на міжнародную абарону. Пры гэтым яму выдалі дакументы, што пацвярджаюць, што ў яго прынялі заяву на міжнародную абарону.
"Паколькі я нічога тут не парушыў за паўтара года знаходжання, яны [Кіраўніцтва ў пытаннях замежнікаў. — рэд.] не пагадзіліся з тым вердыктам, што вынеслі мне [у Агенцтве ўнутранай бяспекі. — рэд.], што [трэба. — рэд.] пакінуць Польшчу, бо я пагроза бяспецы", — перадае "Белсат" словы мужчыны.
Беларус мяркуе, што затрымалі яго памылкова.
Як расказвала Еўрарадыё, мужчына пакінуў Беларусь на пачатку 2023 года пад пагрозай палітычнага пераследу. У Польшчы ён падаваў заяву на ВНЖ, але яму адмовіла Агенцтва ўнутранай бяспекі, назваўшы пагрозай нацыянальнай бяспецы. Магчыма, адбылася бюракратычная памылка, і Аляксандра С. паблыталі з іншым чалавекам.
Мужчына кажа, што з ім звязваліся беларускія сілавікі і прапаноўвалі здымаць у Польшчы вайсковую тэхніку. За гэта яму абяцалі беспраблемнае вяртанне на радзіму. Аднак Аляксандр, па яго словах, адмовіўся.
Затрымалі мужчыну, калі ён паехаў у памежнае аддзяленне падаваць заяву на міжнародную абарону. Хутчэй за ўсё, падставай стала ўжо згаданае заключэнне Агенцтва ўнутранай бяспекі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.