Як падбіраецца, ставіцца і ўплывае музыка для Чэмпіянату свету па хакеі

Адбор музыкі, якая будзе гучаць на матчах падчас чэмпіянату свету па хакеі, цалкам даверылі гукарэжысёрам лядовых арэн. Адзінае патрабаванне Міжнароднай федэрацыі хакея: ніякай прапаганды гвалту ды ніякай нецэнзурнай лексікі.

“Не столькі мае ўласныя музычныя густы, колькі агульна нашага калектыву, — распавядае кіраўнік аддзелу электронна-інфармацыйнага забеспячэння “Чыжоўка-Арэны” Аляксей Андросаў. — У нас розную музыку слухаюць, але хакей больш асацыюецца з сілавой гульнёй. Тым не менш, у нас даволі шмат танцавальных кампазіцый, той жа “Gangnam Style” мы ставілі, ці “What is Love”. Але ў асноўным хакею больш пасуе рок, каб у людзей ды саміх хакеістаў настрой быў баявы”.

Напрыклад, на “Чыжоўка-Арэне” плэй-ліст для агучкі матчаў складаецца са 150 сучасных замежных хітоў. Запланаваць, які з іх паставіць у наступны момант, натуральна, немагчыма, але і ніякіх экстрановых і складаных прыладаў гукарэжысёры не выкарыстоўваюць.

“Ды ў тым жа AIMP (папулярны камп’ютарны мультымедыйны прайгравальнік) можна зрабіць колькі патрэбна ўкладак, — дзеліцца сакрэтам Аляксей Андросаў. — На раскатку — свая ўкладка, на танцавальныя забіўкі — свая, для фан-камеры свае забіўкі, калі нейкая кароценькая паўза, то проста ставім арганны кавалачак… А далей проста хуценька прагартаў патрэбную ўкладку і паставіў. Тым больш, у нас шмат хто з супрацоўнікаў раней былі DJ, таму яны ведаюць, што і як хутка рабіць з музыкай”.

Амаль усе зборныя самі выйшлі на гукарэжысёраў і перадалі песні, якія хацелі б пачуць падчас уласных гульняў. У асноўным, гэта трэкі менавіта з нацыянальным каларытам ці вядомыя ў краіне мясцовыя хіты. Праўда, на “Чыжоўка-Арэне” не выступалі ні беларуская, ні расійская, ні казахская каманды, таму там абышліся толькі англамоўнымі трэкамі. Рок-аранжыроўку “Купалінкі”, песні “Песняроў”, BeZ bileta ды “Лепрыконсаў” можна было пачуць толькі на “Мінск-Арэне”. Прынцып адбору: тое, што на слыху, што людзі гатовыя падтрымаць і што пакажа, што мы ў Беларусі.

“Я пераслухаў вельмі шмат кампазіцый, але яны па фармаце не падыходзяць для хакея, — тлумачыць такі малы адсотак беларускамоўных песень гукарэжысёр “Мінск-Арэны” Вадзім Крывавяз. — У тых жа BeZ bileta ёсць добрая песня “Мая краіна Беларусь”, але яна тужлівая… Тое ж і з сучаснымі песнямі маладых музыкаў, тыя ж ili-ili… А тыя гурты, што пісалі песні пра хакей ды Беларусь да чэмпіянату, то я не ведаю, з чаго яны вырашылі, што напісалі хакейную песню. Я лічу, што гэта чарговыя песні ў выкананні гурта, а не хакейныя трэкі”.

І ў дадатак, не трэба забывацца, што хакейная паўза можа цягнуцца ад секунды да некалькіх хвілін, а за гэты час у песнях можа праскочыць і якое-небудзь непатрэбнае слова ці выраз. Не ўсе ж беларускія рок-гурты будуць добра ўспрымацца чыноўнікамі.

“Магу сказаць, што дыджеем у клубе прасцей працаваць, бо туды людзі мэтанакіравана ідуць весяліцца, танчыць і ў іх з большага лепшы настрой, — працягвае Вадзім, які ўжо два гады афармляе матчы хакейнага клуба “Дынама-Мінск”. — А калі ідзе барацьба, то трэба падтрымаць каманду, калі, напрыклад, шайбу не залічылі ці ідзе бойка, то трэба дадаць эмацыйнасці праз музыку. Сама гульня адбываецца на лёдзе, а ўсё астатняе — гэта ўжо шоў! Шоў з балельшчыкамі, якім трэба ствараць настрой!”.

Нагадаем, што паслухаць працу і падборкі гукарэжысёраў мінскіх лядовых арэна можна будзе ўжо сёння. 22 траўня адбудуцца матчы Канада — Фінляндыя ("Чыжоўка-Арэна", пачатак а 16-й гадзіне), Расія — Францыя ("Мінск-Арэна", 17.00), ЗША — Чэхія ("Чыжоўка-Арэна", 20.00) і Беларусь — Швецыя ("Мінск-Арэна", пачатак а 21-й гадзіне).

Паўфіналы пройдуць у суботу, 24 траўня, а фінал і матч за "бронзу" — 25 траўня. Усе гэтыя паядынкі адбудуцца на "Мінск-Арэне".