Як загадзя трэба выехаць, каб паспець у аэрапорт Вільні? Парады ад вандроўнікаў

09/07/2024 - 13:09

Шанс на спазненне ў аэрапорт рэзка вырас

Шанс на спазненне ў аэрапорт рэзка вырас / airport-world.com

“Мінск — Вільня, 5 ліпеня, 11:00-22:00. Усе, хто мог, спазніліся на самалёты. Аўтобус наперадзе быў усяго адзін. Проста ўсе доўга стаялі, незразумела чаму”, — апошнімі днямі такія допісы не рэдкасць у чатах, дзе беларусы дзеляцца досведам перасячэння мяжы з краінамі Еўрасаюза.

Паездка з Беларусі ў Польшчу і Літву ператварылася ў латарэю. У адзін дзень мяжу можна прайсці ўвогуле без чаргі, у іншы можна пратырчаць суткі. А што рабіць пасажырам, якія набылі білеты на самалёты з польскіх аэрапортаў ці з аэрапорта Вільні і якім крытычна ў пэўны час, без спазненняў, трапіць на пасадку? За колькі выязджаць?

Еўрарадыё распытала пра гэта беларусаў-вандроўнікаў. Усе імёны ў гэтым тэксце мы змянілі з меркаванняў бяспекі.

Не чакайце — мяняйце білеты

“Я заўсёды ездзіла з Мінска на гэтым аўтобусе на 11:00, начавала ў гатэлі, а раніцай наступнага дня ў мяне быў самалёт. Але гэта толькі пасля таго, як я атрымала ўрок, спазнілася на самалёт, — адказвае пасажырцы з няўдачлівага аўтобуса іншая вандроўніца. — Цяпер лепш заплачу за гатэль і прыеду адпачыўшы, чым змарную кучу грошай і нерваў”.

“Час паміж адпраўленнем з Мінска і самалётам — 12 гадзінаў. Думала, што дастаткова. Але цяпер пачынаю задумвацца, каб набыць іншыя білеты. Мінск — Вільня”, — піша іншая пасажырка.

“Не чакайце — мяняйце на крыху раней”, — адразу ж раяць ёй.

Мінімум за суткі

Пра свой досвед перасячэння літоўскай мяжы Алена расказвае з трывожнымі ноткамі:

“Раней спакойна выязджала за двое сутак да вылету, [які планаваўся] позна вечарам. Праходзіла мяжу, начавала, ехала ў аэрапорт. Пазаўчора [сёмага ліпеня — Еўрарадыё] выязджала ў 17:30 з Мінска. Вылет быў у 19:40 8 ліпеня. Баялася, што не паспею”.

Усё скончылася добра, але толькі дзякуючы перасадцы ў іншы аўтобус. “Паслуга” каштавала 45 долараў рублямі.

“Лічу, што пашчасціла. Але вырашыла, што больш так рызыкаваць не буду, бо цяпер вольных месцаў у аўтобусах можа і не быць, шмат хто вось так перасаджваецца. А пра тое, каму месца патрэбнейшае, ніхто дамаўляцца не будзе”, — кажа дзяўчына.

Таксама яна раіць загадзя забраніраваць жытло недалёка ад аэрапорта.

Логікі няма

Яшчэ адна падарожніца вывела для сябе просты прынцып перасячэння мяжы: трэба заўжды арыентавацца на найгоршы час. "Хуткая мяжа — бонус пагуляць па Вільні", — лічыць яна.

"Няма ні логікі, ні алгарытму ў праходжанні мяжы. Трэба толькі на статыстыку арыентавацца, а яна кажа, што больш за 17 гадзінаў пакуль ніхто не стаяў, у сярэднім — 7-11. Атрымліваецца, каб напэўна паспець, трэба выязджаць за суткі.

І ў лепшыя часы было рэгулярна так, што ў каго-небудзь то дакументы не ў парадку, то багаж нейкі не такі, і затрымкі праз гэта. Так што арыентуемся на найгоршы час. І плануем паездкі!"