Яшчэ адзін паляк папрасіў прытулку ў Беларусі

Яшчэ адзін паляк папрасіў прытулку ў Беларусі. Як паведамляе прэс-служба Дзяржаўнага памежнага камітэта, 17 жніўня ён з'явіўся ў пункт пропуску "Брэст" "у бязвізавым парадку". Калі мужчына праходзіў памежны кантроль, ён "звярнуўся да беларускіх памежнікаў за прадастаўленнем статуса бежанца".

Паляк заявіў, што заклапочаны небяспекай для ўласнага жыцця і здароўя. З чым гэта звязана, не ўдакладняецца. Грамадзяніна Польшчы прапусцілі праз мяжу ў Беларусь і "рэкамендавалі звярнуцца ў органы МУС за атрыманнем адпаведнага статуса".

Гэта не першы "перабежчык" з Польшчы. Раней у Беларусь уцёк вайсковец-дэзерцір Эміль Чэчка (пасля яго знайшлі ў Мінску павешаным), у чэрвені папрасіў палітычнага прытулку Марцін Мікалаек.