За дапамогу ад INeedHelpBY асуджаныя не менш як 100 чалавек

За дапамогу ад ініцыятывы INeedHelpBY прайшло ўжо не менш як 100 судоў, паведамляе праваабарончы цэнтр "Вясна".

Рэйд КДБ па экс-палітвязнях і сваяках палітвязняў адбыўся напрыканцы студзеня. Падчас яго за атрыманне прадуктовай дапамогі пераслед зазналі не менш як 287 чалавек.

Прынамсі 127 чалавек былі асуджаныя па адміністрацыйных справах, а 100 з іх — паводле арт. 24.15 КаАП (выкарыстанне замежнай бязвыплатнай дапамогі). Суды прызначаюць гэтым людзям вялікія штрафы і патрабуюць кампенсацыю сумы аплаты прадуктаў у "Е-дастаўцы". Звесткі пра атрымальнікаў дапамогі сілавікі ўзялі пераважна з гэтай службы дастаўкі.

Праваабаронцы заклікаюць беларусаў, якія сутыкнуліся з такімі прысудамі, абскарджваць рашэнні судоў. Па-першае, застаецца шанц на адмену рашэння. Па-другое, працэс абскарджвання дазваляе адтэрмінаваць выплату штрафу мінімум на два месяцы.

Як паведамлялася раней, частку пацярпелых па гэтай справе эвакуявалі з дапамогай фонду BySol.