Жыхарам брэсцкага мікрараёна Граеўка дазволілі карыстацца водаправодам
5 верасня ад 8-й гадзіны знятыя ранейшыя абмежаванні на спажыванне вады ў мікрараёне.
Пра гэта паведамляе БелаПАН са спасылкай на брэсцкіх ратавальнікаў.
Нагадаем, што з вечара 1 верасня ў мікрараёне пайшла вада з пахам фекаліяў. Пробы вады, узятыя на выпуску водазабору Брэст-Усходні гэтага ўчастка, не адпавядалі санітарным нормам па паху і акісляльнасці.
Як выявілася, прычынай стала парушэнне правілаў эксплуатацыі водазаборных збудаванняў на Брэсцкім участку Баранавіцкай дыстанцыі водазабеспячэння і санітарна-тэхнічных прылад.
Пасля праверкі супраць кіраўнікоў Брэсцкага ўчастка, Баранавіцкай дыстанцыі водазабеспячэння і санітарна-тэхнічных прылад, а таксама прадпрыемства "Дарводаканал" пачалі адміністрацыйны працэс.
Было праведзенае прамыванне, дэзінфекцыя рэзервуараў чыстай вады водазабору, свідравін і размеркавальных сетак, вёўся пастаянны маніторынг якасці вады.
Выпадкаў кішэчных інфекцый сярод насельніцтва не зарэгістравана.