ЗША: ПВК "Вагнер" страціла больш за 30 тысяч чалавек ва Украіне
Магілы вагнераўцаў на могілках каля станіцы Бакінская ў Краснадарскім краі, Расія, 22 студзеня 2023 году / REUTERS / Stringer
Расійская прыватная ваенная кампанія "Вагнер" страціла больш за 30 тысяч чалавек з моманту ўварвання Расіі ва Украіну. З іх каля 9 тысяч чалавек забітыя, паведаміў Белы дом.
Па ацэнках ЗША, 90% вагнераўцаў, забітых ва Украіне са снежня, былі асуджанымі. Таксама палова смерцяў адбылася з сярэдзіны снежня, паколькі баявыя дзеянні у Бахмуце ўзмацніліся, адзначае афіцыйны прадстаўнік Савета нацыянальнай бяспекі Белага дома Джон Кірбі.
Кірбі кажа, што група наймітаў паступова дамаглася поспехаў у Бахмуце і яго ваколіцах за апошнія некалькі дзён, але на гэта сышло шмат месяцаў, і гэта абышлося "зруйнавальнай цаной".
— Магчыма, у канчатковым выніку яны даб'юцца поспеху ў Бахмуце, але гэта не прынясе ім рэальнай карысці, таму што гэта не ўяўляе рэальнай стратэгічнай каштоўнасці.
Кірбі дадае, што ўкраінскія сілы захоўваюць моцную абарону.
