Мінскае метро падзялілася на "цягнікі" і "паязды"

Пасля шматлікіх зваротаў грамадзян дырэктар мінскага метрапалітэну Расціслаў Юрэня паабяцаў, што абвестак на рускай мове ў метро не будзе.

Цяпер па-беларуску агучваюць не толькі назвы прыпынкаў, але і папярэджанні пра тое, што нельга заходзіць у вагоны пасля аб’явы пра закрыццё дзвярэй, і нават сацыяльную рэкламу пра эканомію электрычнасці. Можна сказаць, што метро стала цалкам “свойскім”, піша “Наша Ніва”.

Гэта не першы падобны выпадак: у канцы 2011 году ў метро на рускую мову пераклалі аўдыёролік, які заклікаў пасажыраў да ветлівасці, але пасля шматлікіх зваротаў грамадзян ізноў вярнулі беларускі варыянт абвесткі.