Адкрыты рух па новым пуцеправодзе на Нямізе
Ноччу па новым мосце праехалі першыя машыны / @minsknews_by
У Мінску мінулай ноччу адкрылі рух па мосце ў раёне вуліцы Няміга. Па ім праехалі першыя аўтамабілі. А з раніцы на звыклыя маршруты вярнуліся аўтобусы і тралейбусы.
Новы мост адрозніваецца ад старога. Будаўнікі павялічылі дарожны прасвет, а таксама шырыню на 4 метры, распавёў дырэктар прадпрыемства "Гардарбуд" Сяргей Панеў. Яго словы прыводзіць агенцтва "Мінск-Навіны". Акрамя таго, па словах Панева, вырасла апорная здольнасць. Напярэдадні пуцеправод выпрабавалі нагрузкай 200 тон на кожны пралёт.
Частка аўтамабільнага моста ў раёне вуліцы Няміга абрынулася ў ноч з 7-га на 8-га студзеня. Пацярпела пешаходная секцыя — ўпалі агароджа і тратуар. Ніхто не пацярпеў. Гарадскія ўлады прынялі рашэнне цалкам разабраць мост і пабудаваць новы. На аднаўленне адвялі месяц.
