Афіцыйна: дарадца Трампа Джон Болтан сустрэнецца ў Мінску з Лукашэнкам і Макеем
![Джон Болтан у Вашынгтоне / Reuters](/sites/default/files/styles/gallery_main/public/2023-08/bolton2908.jpg.webp?itok=WILxmY2d)
Джон Болтан у Вашынгтоне / Reuters
Дарадца прэзідэнта ЗША Дональда Трампа па нацыянальнай бяспецы Джон Роберт Болтан II наведае Мінск 29 жніўня. У графіку высокага чыноўніка дзве сустрэчы: з кіраўніком Беларусі Аляксандрам Лукашэнкам і міністрам замежных спраў Уладзімірам Макеем. Пра гэта паведамляе ў сваім Facebook-акаўнце амбасада ЗША ў Беларусі.
Джон Болтан едзе ў Мінск, каб "абмеркаваць пытанні рэгіянальнай бяспекі і падкрэсліць падтрымку ЗША суверэнітэту і незалежнасці Беларусі".
У Беларусь Болтан прыедзе з Украіны, дзе таксама знаходзіцца з афіцыйным візітам. У прыватнасці, ён сустрэўся з прэзідэнтам Украіны Уладзімірам Зяленскім і ўсклаў кветкі да мемарыяла ў гонар салдат, якія загінулі ў час канфлікту на паўднёвым усходзе Украіны.
Прыезд Болтана ў Беларусь суправаджаецца актывізацыяй прарасійскай прапаганды. Еўрарадыё прааналізавала, якія паведамленні ўяўляюць з сябе відавочныя фэйкі, а якія могуць мець дачыненне да рэчаіснасці.