Алега Ларычава асудзілі на пяць сутак арышту
Каардынатара суполкі вулічных мастакоў Signal project Алега Ларычава асудзілі на пяць сутак арышту. Такі прысуд вынесла суддзя Цэнтральнага суда Мінска Вікторыя Шабуня 28 красавіка.
Ларычава судзілі па абвінавачанні ў дробным хуліганстве — нібыта ён лаяўся матам і парушаў грамадскі парадак. Сам хлопец кажа, што ўвечары 26 красавіка толькі выйшаў з піцэрыі, калі яго ўжо чакалі два амапаўцы і мікрааўтобус.
Хлопец прасіў каб у судзе паглядзелі запіс з відэакамеры АПАМаўца, які затрымліваў яго. Аднак было абвешчана, што запісу няма, бо ў відэакамеры села батарэйка сілкавання.
Дарэчы, суддзя Вікторыя Шабуня была ў спісе неўязных у краіны Еўрасаюза і ЗША, але потым была выключаная з яго — падчас пацяплення адносінаў паміж краінамі. Тым не менш Шабуня працягвае выносіць палітычныя прысуды.Напрыклад, нядаўна яна прысудзіла праваабаронцу Таццяну Равяка да штрафу — таксама нібыта за публічную лаянку матам. Таксама яна судзіла ўдзельнікаў сакавіцкіх "Маршаў недармаедаў".
