Амбасадар Ізраіля знайшоў інвестара для рэстаўрацыі быхаўскай сінагогі

Пра гэта стала вядома 30 ліпеня, калі рэшткі Быхаўскай сінагогі наведалі ізраільскі амбасадар Іосіф Шагал і інвестар Раман Спектар, паведамляе сайт Магілёўскага аблвыканкама.

Па ацэнках спецыялістаў, поўная рэстаўрацыя будынка можа каштаваць 700 тысяч долараў. Усёй сумы ў інвестара пакуль няма, аднак ён плануе арганізаваць збор сродкаў. Раней на кансервацыю сінагогі беларускія ўлады перавялі 350 мільёнаў рублёў.

Быхаўская сінагога была пабудаваная ў 1640-1650 гадах. Разам з касцёлам і замкам яна ўваходзіла ў сістэму абароны горада-крэпасці. Яе сцены маюць таўшчыню два метры. Будынак з’яўляецца ўнікальным. Падобныя сінагогі ў Вільні і Пінску не захаваліся да нашых дзён.

Фота — region.mogilev.by