Банкір: У бліжэйшы час крэдыты не патаннеюць
Пры гэтым банкі зацікаўленыя ў зніжэнні ставак, бо не могуць выдаваць столькі крэдытаў, колькі патрабуюць кліенты.
Такое меркаванне выказаў у кулуарах Сусветнага тыдня прадпрымальніцтва старшыня праўлення ЗАТ "МТБанк" Андрэй Жышкевіч.
"Тыя перадумовы, якія робяць стаўкі высокімі (а гэта, перш за ўсё, дэвальвацыйныя чаканні ўкладчыкаў ў беларускіх рублях), імгненна не знікаюць. І тут толькі паступовым, непазбежным ў гэтым сэнсе спакойным тэмпам праца можа весціся. Нацыянальным банкам, само сабой, і канкрэтнымі банкамі. Але для гэтага неабходны працяглы перыяд часу".
Андрэй Жышкевіч
Тым часам, стаўкі па рублёвых дэпазітах адолелі псіхалагічны бар'ер у 50% гадавых. Пік на 19 лістапада — 53%, а зрабіць ўклад пад 52% прапануюць адразу некалькі банкаў, у тым ліку і "МТБанк".
Пры гэтым Андрэй Жышкевіч лічыць, што з гледзішча ўстойлівасці беларуская банкаўская сістэма цалкам збалансаваная. Але яна разбалансаваная з пункту гледжання патэнцыялу росту эканомікі.
"Зразумела, што пры такіх стаўках банкі не могуць выдаваць той аб'ём крэдытаў, які хацелі б, і ў якім ёсць неабходнасць у кліентаў. Гэта значыць, у цэлым мы ўсе зацікаўлены ў зніжэнні ставак, гэта адназначна. Пытанне ў тым, наколькі гэта цяпер магчыма і актуальна. Абсалютна аб'ектыўна — зараз стаўкі вельмі высокія. Але калі стане магчымым іх зніжэнне? Гэтае пытанне пакуль адкрытае".
Фота: Fotolia, style.bel.biz.
