Беларусь часова прыпыніла экспарт нафтапрадуктаў

Беларусь часова прыпыніла экспарт нафтапрадуктаў. Пра гэта Еўрарадыё паведамілі ў прэс-службе канцэрна "Белнафтахім". Прычынай такога рашэння стала прыпыненне з 1 студзеня паставак у Беларусь нафты з Расіі. З-за гэтага загрузка беларускіх НПЗ зніжана да мінімума. Яны працуюць на запасах, якія былі зроблены ў снежні 2019-га.

Беларусь не паспела падпісаць кантракты на пастаўкі нафты з Расіі ў 2020 годзе. У апошні дзень 2019-га сітуацыю паспрабаваў асабіста вырашыць Аляксандр Лукашэнка. Ён размаўляў па тэлефоне з расійскімі прэзідэнтам, прэм'ерам і нават міністрам энергетыкі. Было заяўлена, што Лукашэнка дамовіўся з Дзмітрыем Мядзведзевым пра пастаўкі нафты без заключэння кантрактаў. Аднак у першыя дні новага года іх няма. У той жа час транзіт расійскай нафты праз Беларусь працягваецца. На нарадзе 31 снежня Аляксандр Лукашэнка даручыў тэрмінова шукаць альтэрнатыўныя каналы паставак нафты, аднак хутка гэта зрабіць праблематычна.

Экспарт нафтапрадуктаў мае вялікае значэнне для беларускай эканомікі. Штогод нашы нафтаперапрацоўчыя заводы атрымліваюць мільярды долараў за продаж прадуктаў нафтаперапрацоўкі за мяжу. Самым буйным гандлёвым партнёрам Беларусі на гэтым рынку з'яўляецца Украіна. За студзень-кастрычнік 2019 года Беларусь экспартавала ва Украіну 2,7 млн тон нафтапрадуктаў на $1,6 млрд. За той жа перыяд ва ўсе краіны Еўрасаюза наша краіна прадала 5,8 млн тон нафтапрадуктаў на $2,6 млрд.