Бізнэсмена Арбузава, які знаходзіцца пад следствам, выпусцілі на волю
Бізнэсмен Віталь Арбузаў, якому належыць група кампаніяў Fenox Global Group, выйшаў на волю. Як паведамляе TUT.by, прадпрымальнік знаходзіўся за кратамі болей за год — ён з’яўляецца фігурнатам справы аб маштабных эканамічных злачынствах. Цяпер, пакуль ідзе следства, Арбузаў будзе на волі. За яго даручылася некалькі асобаў.
У красавіку 2017 года Дэпартамент фінансавых расследаванняў Камітэта дзяржкантролю сумесна з Дэпартаментам фінансавага маніторынгу КДК выявіў у дзейнасці старшыні групы кампаніяў Fenox Global Group і шэрагу службовых асобаў беларускіх прадпрыемстваў маштабныя парушэнні, звязаныя з ухіленнем ад уплаты падаткаў, а таксама з неправамерным атрыманнем з бюджэту ПДВ. Паводле КДК, падкантрольныя Арбузаву кампаніі завышалі кошты імпартаванай прадукцыі, а калі прадавалі сваю прадукцыю за мяжу, то рабілі гэта за наяўны разлік і афармлялі дакументы на экспарт па заніжаным кошце. Гэта дазваляла заніжаць выручку і вяртаць з бюджэту ПДВ.
Такім чынам прадпрыемствы групы зводзілі да мінімуму памер падаткаў, якія мелі плаціць у бюджэт. Сума нявыплачаных падаткаў дасягала 40 мільёнаў рублёў. Крымінальныя справы былі распачатыя паводле ч. 1-4 арт. 210 (раскраданне шляхам злоўжывання службовымі паўнамоцтвамі) КК, а таксама паводле ч. 1 і ч. 2 арт. 243 (ухіленне ад уплаты сум падаткаў, збораў) КК.
У студзені паводле справы Fenox Global Group затрымалі яшчэ дваіх фігурантаў. Пад вартай апынулася пяць супрацоўнікаў кампаніі.
