Брэсцкую журналістку Алену Цімашчук асудзілі на 5 гадоў калоніі
Алена Цімашчук / БАЖ
Пяць гадоў калоніі прысудзіў Брэсцкі абласны суд журналістцы Алене Цімашчук. Прысуд быў агучаны 3 чэрвеня, піша dissident.by.
Яе абвінавацілі ў дыскрэдытацыі Беларусі (арт. 369-1 КК), распальванні варожасці (ч. 3 арт. 130 КК), уваходжанні ў склад "экстрэмісцкага фармавання" (ч. 3 арт. 361-1 КК).
Таксама журналістка павінна аплаціць велічэзны штраф — 46 тысяч рублёў.
Цімашчук супрацоўнічала з шэрагам брэсцкіх СМІ — "Зялёны партал", "Брэсцкая газета", "Брэсцкі веснік", была рэдактаркай аддзела навін у ТРК "Брэст" і педагогам-псіхолагам у яслях-садку №12.
Паведамляецца, што Цімашчук не рыхтавала публікацыі на палітычныя тэмы ў незалежных выданнях. Часам яна рабіла рэкламныя артыкулы і пісала на тэмы псіхалагіі, бо ў яе ёсць вышэйшая адукацыя па гэтай спецыяльнасці.
