Замежніка не пусцілі ў РБ, бо ў яго тэлефоне былі фота Лукашэнкі і салдата УСУ

Грамадзяніна адной з краін СНД не пусцілі ў Беларусь, калі ён ехаў з Польшчы, піша MOST.

Мужчына ехаў праз польска-беларускую мяжу на аўтобусе. Яго прыезд прыпаў на час святочнага ажыятажу: у чарзе на мяжы давялося адстаяць амаль двое сутак.

Як мужчына расказаў журналістам, польскія памежнікі праверылі даволі хутка. А ў Беларусі правяралі старанна: вывелі з рэчамі, правялі мабільным сканерам. На пашпартным кантролі асаблівую ўвагу, як кажа мужчына, надавалі "тым, па кім было недастаткова інфармацыі ці хто быў замежнікам".

Пасля праверкі дакументаў яго запрасілі на размову з прадстаўнікамі КДБ. Пыталіся, дзе жыве, якая мэта паездкі ў Беларусь, ці ёсць сябры сярод беларусаў і ўкраінцаў. А потым супрацоўнік КДБ папрасіў яго тэлефон і пачаў глядзець.

"Потым пачаў рабіць фатаграфіі майго смартфона на свой. У нейкі момант паказвае фота жаўнера УСУ, якое я калісьці запампаваў, і фатаграфію Лукашэнкі ў прыніжальным выглядзе. Паказвае мне тэлефон і пытаецца: "Ну-ка, хто гэта на фатаграфіі? І пасля гэтага ты прыязджаеш сюды? Свабодны. Выходзь у калідор", — расказвае мужчына.

Па словах замежніка, ён баяўся, што за абразу Лукашэнкі яго абвінавацяць паводле крымінальнага артыкула і адправяць пад суд: "Было стрэмна. Я яшчэ маральна быў гатовы да "сутак", але за абразу прэзідэнта крымінальная адказнасць, наколькі памятаю. Думаў, гэта канец!"

Аднак мужчыну адправілі назад у кантрольна-прапускны пункт. Яму выдалі пашпарт з забаронай уезду ў Беларусь.