Чаму не Касабуцкі? Хто мусіць узначаліць беларускі Касцёл

04/01/2021 - 15:53

Біскупы Аляксандр Кашкевіч, Казімір Велікаселец і Юрый Касабуцкі

Біскупы Аляксандр Кашкевіч, Казімір Велікаселец і Юрый Касабуцкі

Папа Рымскі Францішак 3 студзеня прыняў адстаўку арцыбіскупа Тадэвуша Кандрусевіча, якому споўнілася 75 гадоў. Замест яго часова кіраваць архідыяцэзіяй будзе Казімір Велікаселец — вопытны і паважаны святар. Аднак мяркуючы па тым, што Велікаселец на паўгода старэйшы за Кандрусевіча, многім здалося, што нешта ў "транзіце ўлады" паміж каталіцкімі іерархамі ў Беларусі пайшло не так.

А як гэта звычайна адбываецца?

Паводле кананічнага права, калі кафедра аказваецца вакантнай, яе ўзначальвае генеральны вікарый. У нашым выпадку гэта біскуп Юрый Касабуцкі. Які, дарэчы, замяняў Кандрусевіча падчас ягонага чатырохмесячнага выгнання, а цяпер застаецца адначасова генеральным вікарыем і біскупам-памочнікам.

Аднак Касабуцкі, які адкрыта падтрымліваў Кандрусевіча, лічыцца нязручным для беларускіх уладаў. І Ватыкан пайшоў іншым шляхам — Мінска-Магілёўскую архідыяцэзію ўзначаліў апостальскі адміністратар Велікаселец. Але гэта таксама ўпісваецца ў прынцыпы кананічнага права. Генеральны вікарый узначаліў бы епархію ў выпадку непрадбачаных абставінаў. А сыход Кандрусевіча — свайго кшталту "планавая ратацыя".

Касабуцкі страціў шанцы ўзначаліць Каталіцкі Касцёл у Беларусі?

Прызначэнне Велікасельца апостальскім адміністратарам не азначае, што ён жа потым і ўзначаліць Мінска-Магілёўскую епархію. Арцыбіскупа вызначыць Святы Пасад.

У той жа час прызначэнне Велікасельца не азначае, што прэтэндаваць на пасаду не можа Юрый Касабуцкі, які "і так" мог бы яго замяняць, калі б усё было па каноне. Акрамя таго, арцыбіскупам Мінскім і Магілёўскім можа стаць любы іншы з дзейных епіскапаў, а таксама іншы святар, пасвечаны ў біскупскі сан.

Абмежаванне тут толькі адно: па беларускім заканадаўстве кіраваць рэлігійнай арганізацыяй можа толькі грамадзянін краіны.

Дарэчы, аднойчы ў Беларусі быў апостальскі адміністратар. Пасля сыходу Казіміра Свёнтка ў 2006 годзе і да прызначэння арцыбіскупам у 2007-м Тадэвуша Кандрусевіча абавязкі кіраўніка Мінска-Магілёўскай архідыяцэзіі выконваў Антоній Дзям'янка.

Дык хто цяпер кіруе Касцёлам у Беларусі?

Падчас працы апостальскім адміністратарам Казіміра Велікасельца няправільна будзе называць кіраўніком Каталіцкага Касцёла ў Беларусі. Кіруе ёю старшыня Канферэнцыі каталіцкіх біскупаў. Пасля сыходу Кандрусевіча яе ўзначальвае яго былы намеснік — гродзенскі біскуп Аляксандр Кашкевіч. Канферэнцыяй ён ужо кіраваў — з 2006 па 2015 год.

Почему не Кособуцкий? Кто должен возглавить белорусский Костёл

На адным фота — усе каталіцкія біскупы Беларусі / catholic.by

Калі будуць наступныя выбары кіраўніка Канферэнцыі, пакуль не вядома. Традыцыйна яе кіраўніком выбіраюць кіраўніка Мінска-Магілёўскай архідыяцэзіі, аднак гэта зусім не абавязкова: тут усё застаецца на рашэнне саміх біскупаў.

Сыход жа Кандрусевіча не азначае, што ён пакідае Касцёл. Па кананічным праве ён захоўвае за сабой тытул заслужанага біскупа і можа заставацца жыць і працаваць на тэрыторыі епархіі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.