Чым займаўся Пуцін, пакуль расійскія добраахвотнікі захоплівалі Расію

Пакуль расійскія добраахвотнікі штурмавалі Белгародскую вобласць, Уладзімір Пуцін хваліў бараду Рамзана Кадырава і ўручаў ордэн "Маці-гераіня" яго жонцы. За апошнія два тыдні ён ні слова не сказаў пра падзеі ў Белгародскай вобласці.

Чым жа ён быў заняты? Вы не паверыце.

22 траўня. “Легіён вяртаецца дадому”

Легіён "Свабода Расіі" звяртаецца да жыхароў памежных тэрыторый і просіць "заставацца дома, не аказваць супраціў і не баяцца".

— Легіён вяртаецца дадому, — напісалі добраахвотнікі ў сваіх сацсетках.

Тым часам Уладзімір Пуцін.

У Пуціна ўсё пад кантролем. Ён кантралюе бараду Рамзана Кадырава.

"Рамзан Ахматавіч, у вас барада стала крыху большая?" —  "Так, адрошчваю". — "Бачыце, у нас усё на кантролі".

23 траўня. “Спалохаўся, з'ехаў”

Еўрарадыё звязваецца з жыхарамі Белгародскай вобласці і пытае, што адбываецца. Нам адказваюць:

— Чуў грукат дзесьці за кіламетр ад майго дома — стрэлы са стралковага. І хтосьці ўвесь час крычаў "Свабоду Расіі ад крамлёўскай хунты". На гэты момант не ведаю, што па сітуацыі. Сам спалохаўся і з'ехаў з горада.

Тым часам Уладзімір Пуцін.

Уручае ордэн "Маці-гераіня" жонцы Рамзана Кадырава, маці 13-ці дзяцей.

25 траўня. Фота з “Поштай Расіі”

Рускі добраахвотніцкі корпус запісвае вітальнае відэа на фоне шыльды "Пошта Расіі", каб даказаць, што свае відэа здымае "не ў Кіеве".

Тым часам Уладзімір Пуцін.

Віншуе з Днём Афрыкі і запрашае ўсіх лідараў краін кантынента ў РФ.

30 траўня. Падключаюцца беларускія добраахвотнікі

Беларускія добраахвотнікі з батальёна "Тэрор" публікуюць фатаграфію з пераносным зенітна-ракетным комплексам і намякаюць, што ўжо і яны прыбылі ў Белгародскую вобласць.

Тым часам Уладзімір Пуцін.

Вывучае дасягненні расійскай гейм-індустрыі. Абяцае абмеркаваць з партнёрамі з краін БРІКС, як прасоўваць расійскія відэагульні на іх рынкі.

1 чэрвеня. Усе ў сховішчы

Легіён "Свабода Расіі" раіць усім грамадзянскім у Белгародскай вобласці спускацца ў падвалы і сховішчы. "Не дазвольце Крамлю зрабіць з вас "пакутнікаў рэжыму", — пішуць добраахвотнікі.

Тым часам Уладзімір Пуцін.

Размаўляе з дзецьмі і параўноўвае сябе з Дзедам Марозам.

4 чэрвеня. Першыя палонныя

Добраахвотнікі запрашаюць губернатара Белгародскай вобласці на перамовы. Абяцаюць у абмен на магчымасць пагаварыць перадаць яму палонных расійскіх вайскоўцаў.

"Прыязджайце на машыне хуткай дапамогі асабіста, у суправаджэнні кіроўцы, без зброі", — прапануюць добраахвотнікі губернатару (ён не прыехаў).

Тым часам Уладзімір Пуцін.

Не з'явіўся ў публічным полі, але яго прэс-сакратар Дзмітрый Пяскоў запэўніў, што ён на пасадзе "круглыя суткі".

5 чэрвеня. Нічога не адбываецца

У эфіры тэлеканала "Мір" у Расіі з'явіўся экстраны зварот Уладзіміра Пуціна.

Тым часам Уладзімір Пуцін.

Насамрэч у Расіі, вядома ж, нічога экстраардынарнага не адбываецца, таму расійскія дзяржаўныя СМІ адразу ж напісалі, што зварот фэйкавы.

7 чэрвеня. Допыт палоннага

"Свабода Расіі" публікуе відэазапіс з допытам палоннага вайсковага кухара з Пскова. У маладога чалавека спрабуюць высветліць, за што ваюе Расія і навошта ён сам пайшоў ваяваць.

Тым часам Уладзімір Пуцін.

Даручыў ураду ўвесці з 2024 года ў школах навучальны курс "Чарчэнне".

Апошнія навіны з Белгародскай вобласці

"Даволі прадказальна, Маскву лёс правінцыі не абыходзіць", — рэзюмавалі вынікі гэтых двух тыдняў расійскія добраахвотнікі.