Што за машыны праязджалі да Дароў вешчуноў у абыход чаргі? (Відэа)

Пакланенне Дарам вешчуноў у Мінску паказала прыемны хрысціянскі бок беларусаў. Колькасць паломнікаў пераваліла за паўмільёна чалавек. Нават на 16-градусным марозе, на пранізлівым ветры людзі выстойваюць у чарзе па восем гадзін і нават больш. Ні холад, ні іншыя цяжкасці не спыняюць паломнікаў, сярод якіх шмат пенсіянераў, слабых людзей і нават дзяўчат у спадніцах…
 

Не скажаш, што чарга на пакланенне арганізавана дрэнна. Паставілі нават некалькі аўтобусаў, дзе людзі так-сяк адаграваюцца пасля стаяння на шалёным марозе. 

А стаяць даводзілася часам па восем гадзін.

“А адна жанчына расказвала, што столькі прабыла ў чарзе і не трапіла да дароў, ― раілі хлопчыкі-валанцёры з БРСМ. ― А каб прайсці чаргу хутка, кажуць, трэба прыйсці ў 6.00. І тады прастаіце паўтары гадзіны”.

Хоць нават ранні прыход  у чаргу не гарантаваў лёгкага паходу да святыні.

“Я прыйшла ў 6.30, а пакланілася толькі а палове на 12-ю”, ― падзялілася досведам адна з задаволеных паломніц, якая вось-вось выйшла з Дома міласэрнасці.

***

Хоць не ўсе людзі доўга стаялі ў чарзе. На міліцэйскім блок-посце з боку метро прапускалі цяжарных, інвалідаў і паломнікаў, што прыязджалі з іншых гарадоў.

 А з вуліцы Францыска Скарыны (іншы бок Дома міласэрнасці) стаіць пост ДАІ, які прапускае толькі абраныя аўтамабілі. Кожны з іх спецназаўцы правяраюць на наяўнасць выбуховых прыладаў.  І прапускаюць на тэрыторыю.

Аднак на блок-посце не пускаюць нават машыны з інвалідамі першай групы, якія трапілі ў спецыяльныя спісы. Транспарт  паркуюць на вуліцы Францыска Скарыны.

Каго ж праз гэты блок-пост прапускаюць?  На некаторых машынах ёсць пропуск “Дары вешчуноў”, а на некаторых ― няма.

У Маскве і Санкт-Пецярбургу, калі святыні пакланяліся там, такія падазроныя аўто ахрысцілі “блатнымі”. У інтэрнэце іх наяўнасць выклікала крытыку.      

 “Хто ж тут заязджае?” ― цікавімся ў інспектара ДАІ, які абслугоўвае блок-пост.

“Той, хто жыве тут, той, хто едзе на Volvo-сэрвіс, і тыя, хто працуюць. Гэта ― службовы ўваход”, ― патлумачыў інспектар.

Такія машыны заязджаюць тут кожную хвіліну. Усе аўтамабілі, якія мы бачылі, кіраваліся на тэрыторыю  Дома міласэрнасці, дзе няма жылога кварталу. Таму варыянт з мясцовымі жыхарамі можна адкінуць.  

Аўтамабілі Volvo сапраўды маглі ехаць на СТА. Такі бізнесок на тэрыторыі Дома міласэрнасці маецца.

Ну а тое, што ў храме працуе так шмат абслуговага персаналу, верыцца з нацягам.  Тым больш што прыстойныя іншамаркі рэгулярна выязджаюць з брамы службовага ўваходу. Ну не можа ж быць такой інтэнсіўнай цякучкі кадраў! Кадраў, апранутых у дарагія шубы і на дарагіх машынах.

У той жа час абурацца на рознага кшталту блатных паломнікаў, калі такія ёсць, не варта. Падчас любога мерапрыемства, дзе ёсць вялікая чарга, ёсць і “блатныя”, што ў чарзе з простымі людзьмі не стаяць.

Але святары папярэджваюць, што Боскую ласку атрымлівае той вернік, які самааддана, з адкрытым сэрцам  стаіць у чарзе. А блатны паломнік, які трапляе да святыні з чорнага ўвахода, усё адно не адчуе  анёльскага хараства, бо такі шлях да святыні можна параўнаць з паходам у мастацкі музей.