Дэпутат Канапацкая праз сакрэтнасць перамоваў з Расіяй звярнулася ў пракуратуру
![Дэпутат Канапацкая праз сакрэтнасць перамоваў з Расіяй звярнулася ў пракуратуру](/sites/default/files/styles/gallery_main/public/2023-08/dsc_6162.jpg.webp?itok=uM_JCokC)
Дэпутат Палаты прадстаўнікоў Ганна Канапацкая праз сакрэтнасць перамоваў Беларусі з Расіяй звярнулася ў пракуратуру. Яна не змагла атрымаць дакументы з прапановамі расійскай працоўнай групы па пытаннях інтэграцыі і з адказамі на іх беларусаў.
"Мая заклапочанасць такой сакрэтнасцю ў працы па інтэграцыі двух дзяржаваў выклікана пагрозамі страты рэальных незалежнасці і суверэнітэту Беларусі... так і нечаканым фарсіраваным інтэграцыйным працэсам", — піша Канапацкая на сваёй старонцы ў Facebook. Яна падкрэслівае, што гэтая праблема турбуе і беларускае грамадства. "Адсутнасць інфармацыі па дадзенай тэматыцы, фактычна яе сакрэтнасць, толькі каталізуе заклапочанасць і сацыяльнае напружанне ўнутры Беларусі", — адзначае дэпутат. Нягледзячы на тое, што кіраўнік дзяржавы і чыноўнікі супакойваюць людзей, кажуць, што пагрозы для незалежнасці няма, беларусы бачаць ультыматумы, ціск і шантаж з боку расійскага кіраўніцтва.
Дэпутат Ганна Канапацкая патрабуе прадаставіць ёй "поўную інфармацыю пра працэсы інтэграцыі Расіі і Беларусі, якія праходзяць", пра працу беларускай працоўнай групы і сумеснай групы з расіянамі па інтэграцыі. Таксама Канапацкая патрабуе, каб у СМІ былі рэгулярныя справаздачы пра "інтэграцыйныя" перамовы.
"Пытанне незалежнасці і суверэнітэту Беларусі сёння адно з нямногіх і самае галоўнае, якое аб'ядноўвае і ўладу, і апазіцыю, і беларускі народ, — піша Ганна Канапацкая. — Таму толькі адкрытасць у гэтым пытанні дасць магчымасць захаваць незалежнасць і суверэнітэт краіны, а таксама кансалідаваць беларускае грамадзтва".
Дарэчы, 9 ліпеня пра працу сумеснай групы па інтэграцыі выказаўся Аляксандр Лукашэнка. Ён пабачыў у дзеяннях расіян "адны абяцанні" і "тармажэнне працэсаў".