Еўрапарламент ухваліў новую рэзалюцыю па Беларусі
Еўрапарламент у чацвер прыняў чарговую рэзалюцыю па Беларусі, піша журналіст Рыкард Ёзвяк.
Парламентарыі заклікалі тэрмінова ўвесці пяты пакет санкцый супраць Беларусі на паседжанні Еўрасавета 21–22 кастрычніка. У рэзалюцыі ўтрымліваецца прапанова ўключыць у яго дадатковыя сектары, у тым ліку металургічны, дрэваапрацоўчы і хімічны, а таксама "Беларуськалій" і "Белтэлекам".
Прапаноўваецца таксама запатрабаваць ад ЕС новых мер супраць Расеі, калі яна працягне падтрымліваць Мінск, і перасцерагчы Маскву і Мінск ад працягу перамоваў аб большай інтэграцыі.
Еўрапарламент у тым ліку лічыць неабходным прызнаць ўсіх супрацоўнікаў КДБ Беларусі неўязнымі.
За рэзалюцыю прагаласавалі 506 дэпутатаў, супраць — 29. Устрымаліся — 139 чалавек.
