Гімназіі: З рэгістрацыяй у два-тры месяцы дакументы першакласнікаў не прымем

11/06/2018 - 14:27

12 чэрвеня беларускія бацькі першакласнікаў панясуць дакументы ў школы і гімназіі. Па новых правілах, іх дзеці цяпер мусяць вучыцца выключна паводле рэгістрацыі: прыпісаны да школы — ідзеш у школу, да гімназіі — у гімназію. Тым больш вялікай розніцы паміж установамі ўжо нібыта таксама няма — праграма гімназіі да 9-га класа нічым не адрозніваецца ад школьнай.

Але бацькі вырашылі не здавацца: гімназія ёсць гімназія, таму пачалі набываць сваім дзецям часовую рэгістрацыю ў дамах, прыпісаных да жаданай гімназіі.

"У гімназіі педагагічны склад лепшы. Мне як маці хочацца даць свайму дзіцяці добры старт. Я б хацела, каб у яго быў добры педагог", — распавяла Еўрарадыё Вольга, якая гатовая для дасягнення сваёй мэты выкласці з кішэні 300 долараў за прапіску.

Здавалася б, бацькі падрыхтаваліся. І тут — сюрпрыз: аказваецца, часовая рэгістрацыя не гарантуе стоадсоткавага паступлення ў гімназію!

“Калі ў вас рэгістрацыя на два-тры месяцы, вашы дакументы не будуць прынятыя, — шакіруе навіной дырэктарка сталічнай гімназіі №22. — На нашым сайце ўсё напісана: у першы клас прымаюцца дзеці, якія пастаянна пражываюць або зарэгістраваныя на тэрмін не меншы за адзін год у мікрараёне гімназіі”.

Дакументы першакласнікаў з часовай рэгістрацыяй пачнуць прымаць 13 чэрвеня. Лёс дзяцей вызначыцца толькі пасля 28 жніўня. Але калі ў гімназію дзіця з набытай рэгістрацыяй усё ж не патрапіць, дзе яму вучыцца? Звяртаемся ў Мінадукацыі:

“Гэта пытанне гарвыканкамаў і аблвыканкамаў. А мы якое дачыненне маем да яго? — каментуе навіну прэс-сакратар Мінадукацыі Людміла Высоцкая. — Калі дзяцей не возьмуць па часовай рэгістрацыі, яны пойдуць у бліжэйшую школу па месцы жыхарства. І бацькі мусяць весці дзяцей па месцы пражывання. Праграма для ўсіх адна, і не трэба ствараць ажыятаж”.

У школах інфармацыю пацвярджаюць:

“Дзіця павінна вучыцца. Мы не можам яго не прыняць па месцы пражывання”, — запэўніваюць Еўрарадыё ў бараўлянскай СШ №2.

Згодна з артыкулам 30 Канстытуцыі РБ, грамадзянін мае права свабодна перасоўвацца і выбіраць месца жыхарства ў межах краіны. З часовай рэгістрацыяй можна галасаваць і нават ісці ў дэпутаты і прэзідэнты. А вось паступаць у гімназію чамусьці нельга.