Ірландская паліцыя адабрала ў цыганоў бялявую дзяўчынку
Сямігадовае дзіцё, не падобнае ні да сваіх бацькоў, ні да сваіх братоў і сясцёр, жыло ў цыганскай пары ў Дубліне.
Рэйд адбыўся пасля таго, як паліцыя атрымала інфармацыю, што ў цыганскай сям'і жыве шасці-або сямігадовая дзяўчынка, якая не падобная на бацькоў. У доме ў прыгарадзе Дубліна паліцэйскія знайшлі некалькі дзяцей, у тым ліку бялявую дзяўчынку з блакітнымі вачыма, паведамляе TUT.BY.
Пара сказала, што дзяўчынка — іх дачка, і што яна нарадзілася ў адной з дублінскіх лякарняў у 2006 годзе. Але паліцэйскіх не задаволілі ні тлумачэнні, ні пасведчанне аб нараджэнні дзіцяці, якое яны палічылі несапраўдным.
У лякарні, у якой нібыта нарадзілася дзяўчынка, няма ніякіх запісаў пра яе нараджэнне. Зараз дзіця знаходзіцца на дзяржаўнай апецы. Паліцыя праводзіць расследаванне.
Практычна ідэнтычны выпадак адбыўся на мінулым тыдні ў Грэцыі, дзе маленькую дзяўчынку-бландынку Марыю знайшлі падчас рэйду ў адным з цыганскіх табараў у цэнтральным раёне краіны. Аналіз ДНК паказаў, што пара, у якой яна жыла, не з'яўляецца яе бацькамі.
Цыганам, у якіх жыло дзіця, выстаўлены абвінавачанні ў выкраданні. Сапраўдных бацькоў Марыі шукаюць па ўсёй Еўропе.
Фота: Reuters.
