Каардынацыйная рада і НАУ выказаліся у справе пашпартоў беларусаў
Актуальным стала пытанне абароны правоў беларусаў замежжа / rada.vision
Каардынацыйная рада прыняла заяву "ў сувязі з беспрэцэдэнтнай дыскрымінацыяй рэжымам грамадзян Беларусі за мяжой". З 7 верасня пачаў дзейнічаць указ Аляксандра Лукашэнкі, паводле якога сотні тысяч грамадзян РБ, якія жывуць у іншых краінах, не могуць атрымліваць новыя пашпарты ў дыппрадстаўніцтвах. Для гэтага ім трэба ехаць у Беларусь, а гэта звязана з рызыкай затрымання.
"Мы вымушаныя канстатаваць, што гаворка ідзе аб адмове дзяржавы ад выканання сваёй функцыі па абароне грамадзян Беларусі, якія пражываюць за мяжой, парушэннях правоў чалавека, у тым ліку фармальнай, на ўзроўні палітыкі, дыскрымінацыі беларускіх грамадзян, якія жывуць за мяжой. Мы канстатуем, што беларускі рэжым парушыў Венскую канвенцыю... Сёння існуе рэальная пагроза таго, што тысячы беларусаў за мяжой, у тым ліку ў краінах ЕС, будуць з несапраўднымі дакументамі, якія сведчаць іх асобу. Гэта яшчэ адна форма рэпрэсій у адносінах да ўсіх грамадзян Беларусі, якія жывуць за мяжой", — гаворыцца ў заяве КР.
Каардынацыйная Рада просіць "міжнародных партнёраў разгледзець пытанне абароны правоў беларусаў замежжа ў межах Генеральнай Асамблеі ААН, у Савеце Еўропы, Еўрапейскай камісіі і кансультатыўнай групе ЕС-Беларусь". Таксама яна звяртаецца да Еўрапейскага парламента "з просьбай уключыць гэтае пытанне для разгляду ў рамках даклада аб адносінах з Беларуссю".
КР лічыць, што дзейснай мерай падтрымкі беларусаў магло б стаць прызнанне пашпарта "Новай Беларусі".
Забарона атрымліваць пашпарты праз амбасады — элемент злачынстваў супраць чалавечнасці, якія працягваюцца ў Беларусі. З такой заявай выступілі ў Народным антыкрызісным упраўленні, якім кіруе Павел Латушка. У НАУ падкрэсліваюць, што працягнуць працу па зборы доказаў і перамовы з заходнімі партнёрамі, каб сітуацыю разглядаў Міжнародны крымінальны суд. Указ Лукашэнкі парушае і адну з базавых дамоў ААН — пакт аб грамадзянскіх і палітычных правах. Але, адзначылі ў НАУ, цяпер няма механізмаў, якія б дазвалялі прымушаць краіны да выканання міжнародных абавязкаў.
