Кіраўнік ЦРУ: Пуцін усё яшчэ думае, як адпомсціць Прыгожыну
Уладзімір Пуцін / kremlin.ru
Прэзідэнт Расіі Уладзімір Пуцін усё яшчэ разважае, як адпомсціць кіраўніку групы наймітаў "Вагнер" Яўгену Прыгожыну, мяркуе кіраўнік ЦРУ Уільям Бернс.
"Тое, што мы назіраем — гэта вельмі складаны танец, — цытуе ВВС заяву Бернса, якую той зрабіў падчас выступу на Aspen Security Forum. — Пуцін звычайна думае, што помста — гэта страва, якую лепш за ўсё падаваць халоднай. <...> Я здзіўлюся, калі Прыгожын пазбегне адплаты".
Мяцеж Прыгожына агаліў уразлівасць у пуцінскай сістэме ўлады. Аднак ПВК "Вагнер" усё яшчэ важны для Расіі, бо дапамагае рэалізоўваць яе інтарэсы ў краінах Афрыкі, падкрэслівае кіраўнік ЦРУ. Таму, імаверна, Пуцін паспрабуе "аддзяліць" Прыгожына ад ПВК.
Раней у гэтым месяцы прэзідэнт ЗША Джо Байдэн выказаў здагадку, што кіраўніка вагнераўцаў могуць атруціць.
“На яго месцы я б сачыў за тым, што ем. Я б сачыў за сваім меню", — пажартаваў Байдэн.
Дырэктар ЦРУ паўтарыў гэтую фразу, сказаўшы: "Калі б я быў Прыгожыным, я б не звальняў свайго дэгустатара".
