Лукашэнка прызначыў уладальніка "Табакерак" спецімпарцёрам тытунёвай сыравіны
![Лукашэнка прызначыў уладальніка "Табакерак" спецімпарцёрам тытунёвай сыравіны](/sites/default/files/styles/gallery_main/public/2023-08/aliexin-0908.jpg.webp?itok=25A5l73c)
Кампанія Аляксея Алексіна "Інтэр Табака" атрымала выключнае права дзяржавы на імпарт тытунёвай сыравіны. Пра гэта гаворыцца ва ўказе №298, які Аляксандр Лукашэнка падпісаў 7 жніўня 2019 года.
Як адзначае TUT.by, "Інтэр Табака" — новае прадпрыемства па вытворчасці тытунёвых вырабаў высокага спажывецкага ўзроўню. Год таму стала вядома, што яна зоймецца выпускам цыгарэт у прамзоне Шабаны. Для гэтага былі нават змененыя межы Мінска.
Апошнім часам Алексін набыў вядомасць у сувязі са з'яўленнем шапікаў "Табакерка", якія ставяць па ўсёй краіне. У снежні 2017 года Лукашэнка даў Алексіну згоду на стварэнне адзінай гандлёвай сеткі ў тытунёвай сферы. Менавіта да гэтай сеткі належаць "Табакеркі".
Алексін займаецца гандлем нафтапрадуктамі, банкаўскай сферай (МТБанк), вытворчасцю мясных вырабаў ("Вялес-Міт"), дэвелапментам, лагістыкай і рэстаранным бізнэсам. Да 2012 года ён быў партнёрам Юрыя Чыжа.