Маці палітвязня Таццяну Севярынец аштрафавалі на 5400 рублёў

Таццяну Севярынец аштрафавалі на 5400 рублёў. Яе прызналі вінаватай у "распаўсюдзе экстрэмісцкіх матэрыялаў" і ў "несанкцыянаваным пікетаванні". Рашэнне прыняў суддзя Першамайскага раённага суда Віцебска Міхаіл Юрчанка. Абодва адміністрацыйныя пратаколы былі складзены паводле "вывучэння" сілавікамі старонак Севярынец у сацсетках, паведамляюць праваабаронцы.

Пра затрыманне Таццяны Севярынец стала вядома 9 студзеня. У той жа дзень з вялікім ціскам яе шпіталізавалі, а пасля да суда, прызначанага на 25 студзеня, адпусцілі дадому.

"Прыцягнулі мяне за тое, што я размяшчала ў сябе ў фэйсбуку яшчэ пры цары Гароху нейкія матэрыялы, якія зараз прызнаныя "экстрэмісцкімі" і яны забароненыя, — казала пасля затрымання Севярынец на відэа сілавікоў. — Але на той момант яны не былі забароненыя і лагатыпы не былі тады забароненыя". 

Таццяна Севярынец — актывістка з Віцебска, маці палітыка, палітвязня Паўла Севярынца (у 2021-м ён быў асуджаны на сем гадоў калоніі ўзмоцненага рэжыму) і пісьменніцы Ганны Севярынец. 

У Гомелі была аштрафаваная Валянціна Міронава, маці былога палітвязня Іллі Міронава, які цяпер жыве за мяжой.