Масква аб'явіла, што расійскія войскі пакідаюць Херсон і адыходзяць за Днепр

Масква аб'явіла, што расійскія войскі пакідаюць Херсон і адыходзяць за Днепр. Па яго левым беразе вырашана "арганізаваць абарону". У сераду пра новы "манеўр войскаў" заявіў камандуючы Аб'яднанай групоўкай расійскіх войскаў генерал арміі Сяргей Суравікін. З ім пагадзіўся міністр абароны РФ Сяргей Шайгу.

Суравікін выклаў Шайгу свае аргументы: Херсон і прылеглыя населеныя пункты не могуць паўнавартасна забяспечвацца і функцыянаваць, 115 тысяч чалавек ужо адтуль выехалі, згаданая "пагроза затаплення" ніжэй Кахоўскай ГЭС. Таму "мэтазгодна арганізаваць абарону" за Дняпром. Генерал назваў рашэнне "няпростым", але дзякуючы яму спадзяецца захаваць жыцці вайскоўцам і "баяздольнасць групоўкі войскаў". "Пачынайце адводзіць войскі", — загадаў Сяргей Шайгу.

"Манеўр войскаў будзе ажыццёўлены ў найбліжэйшыя тэрміны, злучэнні зоймуць падрыхтаваныя абарончыя рубяжы на левым беразе Дняпра", — цытуе словы Сяргея Суравікіна ria.ru.

Херсон быў пад расійскай акупацыяй з пачатку вясны.

"На нашых вачах адбываецца адна з самых ганебных паразаў у расійскай вайсковай гісторыі", — піша гісторык Аляксандр Фрыдман.