Мінчук атрымаў апёкі, калі ў кватэры выбухнуў самагонны апарат (фота)

Каля 10-й гадзіны раніцы 18 ліпеня мінскіх ратавальнікаў выклікалі на завулак Калініна. Паведамлялася, быццам там адбылася ўспышка газу.

Аднак на месцы выкліку ратавальнікі выявілі, што ў кватэры на чацвёртым паверсе жылога дома разарваўся самаробны самагонны апарат, перадае прэс-служба МНС. Сама прылада стаяла на газавай пліце на кухні.

Ад выбуху было разбітае шкло ў шыбе на гаўбцы. Эвакуацыя людзей не праводзілася.

Ад разрыву самагоннага апарата пацярпеў 56-гадовы брат гаспадыні кватэры. Мужчыну шпіталізавалі. Паведамляецца, што ў яго тэрмічны апёк правага пляча і перадплечча першай-другой ступені (30%), а таксама рэзаныя раны пальцаў правай рукі.

Прычына здарэння высвятляецца.