Мінгарвыканкам не дазволіў маліцца ні ў Чырвоным касцёле, ні каля яго
Чырвоны касцёл / Еўрарадыё
Мінгарвыканкам адмовіў вернікам Чырвонага касцёла ў просьбе маліцца ў будынку ці каля яго. Пра гэта гаворыцца ў афіцыйным адказе за подпісам першага намесніка старшыні гарвыканкама Д. Мікулёнка.
Католікі прасілі дазволіць ім збірацца там, дзе не было пажару — у зашклёнай галерэі ўнутры касцёла ці ва ўнутраным дворыку храма на вуліцы.
Чыноўнік адмовіў, спаслаўшыся на "неабходныя мерапрыемствы", звязаныя з пажарам у касцёле. А збор людзей на вуліцы, па яго словах, будзе расцэньвацца як масавае мерапрыемства, што ў Беларусі без дазволу забаронена.
Пажар у касцёле здарыўся напрыканцы верасня. На пачатку кастрычніка стала вядома, што ўлады забіраюць будынак, які быў у арэндзе ў парафіі. Вернікі адмаўляліся забіраць рэчы з касцёла, пратэстуючы супроць гэтых дзеянняў.
