Міны на беларуска-польскай мяжы — наколькі гэта небяспечна для цывільных?

20/03/2025 - 09:19

Беларуска-польская мяжа / strazgraniczna.pl

Польшча хоча ўсталяваць супрацьпяхотныя міны на мяжы з Беларуссю і Расіяй, заявіў намеснік міністра абароны Польшчы Павел Бэйда.

Беларускі сапёр, які ваяваў ва Украіне, перакананы, што міны будуць усталяваныя "ў кіравальным варыянце". То-бок да надыходу небяспечнай сітуацыі, у якой трэба будзе гэтыя міны задзейнічаць, яны будуць стаяць няўзведзенымі. У баявую гатоўнасць іх можна прывесці дыстанцыйна. Гэта ў тым ліку дапамагло б абараніць жывёл, якія жывуць на памежнай тэрыторыі.

"Я не ведаю планаў войска Польшчы. Але ўпэўнены, што калі яны і будуць выкарыстоўваць супрацьпяхотныя міны, то ў кіравальным варыянце. Гэта не сітуацыя баявых дзеянняў, калі ідзеш пратаптанай дзікамі сцежкай і раз-пораз натыкаешся на трупы жывёл", — кажа былы сапёр УСУ.

“Паставіць міннае поле — як пракласці водаправод”

Наш суразмоўца запэўнівае, што калі адбываецца планавае мініраванне мяжы, то цывільнае насельніцтва небяспецы не падвяргаецца. Усе мінныя палі задакументаваныя, складзеныя іх карты, яны рэгулярна правяраюцца.

"Гаворка не ідзе пра нейкае неабслугоўванае месца велізарнай плошчы. Міннае поле ў такім выпадку — гэта проста від камунікацый, як водаправод, напрыклад. І калі ўсё зроблена правільна, а мірнае насельніцтва не парушае забаронаў, то небяспекі для яго няма. Дастаткова ведаць, што за шыльду "Міны" заходзіць нельга", — кажа суразмоўца Еўрарадыё.

Гэта моцна адрозніваецца ад сітуацыі ва Украіне і наогул на тэрыторыях, дзе вяліся баявыя дзеянні. На такіх тэрыторыях ні ў кога няма дакладных карт мінных палёў, і ніхто не можа гарантаваць, што не рабілася незадакументаванае мініраванне. Затое дакладна вядома, што частка боепрыпасаў не разарвалася і ўяўляе небяспеку.

"Так што ні ў якім разе нельга параўноўваць планавае мініраванне і сітуацыю з міннымі палямі ва Украіне. Калі ўсё зроблена правільна і прафесійна, то, калі сітуацыя стабілізуецца, Польшча зможа проста гэтыя міны прыбраць", — кажа сапёр.

Супрацьтанкавую міну можна ўзяць у рукі, але не рабіце так

На адным з вірусных відэа з Украіны відаць, як чалавек будзённа выносіць супрацьтанкавую міну з дарогі, трымаючы на выцягнутых руках. Так можна?

Украинец переносит с дороги противотанковую мину. Не повторяйте (никогда!)

"Узяць у рукі супрацьтанкавую міну магчыма, але рабіць гэта катэгарычна нельга. Па савецкіх стандартах пад пэўнай колькасцю гэтых супрацьтанкавых мін абавязкова ўсталёўвалася міна-пастка, якая працуе на расцісканне. Здымаеш з яе вагу — атрымліваеш выбух. Гэта рабілася для таго, каб праціўніку было складана размініраваць", — кажа сапёр.

Мы пытаем, ці можа хто-небудзь з цывільных проста сцягнуць міну з міннага поля.

"Ну, можна і аўтамат скрасці ў памежніка, калі ён не бачыць. Мінныя палі, безумоўна, ахоўваюцца, як і любыя будынкі пад абаронай. Але скрасці можна што хочаш", — адказвае наш суразмоўца.

Ну добра, а ва Украіне міны крадуць?

"У вясковай хаце знаходзілі трохметровыя ракеты з кінутых рускіх рэактыўных сістэм залпавага агню. Не тое каб быў сэнс гэтыя ракеты расцягваць, проста людзі ў вёсках гаспадарлівыя. Да мяне асабіста ў прыфрантавой вёсцы звярнуўся дзядуля, які прыцягнуў пад катух неразарваны рускі снарад. Рэкруты кошкамі адцягнулі снарад у поле і там узарвалі.

Але на ўсялякі выпадак заклікаю чытачоў Еўрарадыё міны не пі***ь", — просіць сапёр.