Місія ААН зафіксавала масавыя забойствы грамадзянскіх асобаў на Данбасе
Маніторынгавая місія ААН па правах чалавека ва Украіне зафіксавала на Данбасе факты масавых забойстваў цывільных асобаў, выкраданні людзей, катаванні, сэксуальны гвалт, прымусовую працу і вымагальніцтва грошай. Усё гэта здзяйснялі баевікі-сепаратысты.
Пра гэта гаворыцца ў каментары МЗС Украіны ў сувязі з публікацыяй 11-га дакладу Упраўлення Вярхоўнага камісара ААН па правах чалавека пра становішча ў галіне правоў чалавека ва Украіне. Даклад ахоплівае перыяд з 16 траўня да 15 жніўня 2015 года, інфармуе УНІАН.
У дакладзе таксама падкрэсліваецца, што на правы чалавека ў рэгіёне ўплываюць знешнія фактары — пастаўкі з тэрыторыі Расіі ваенных сіл, узбраенняў і боепрыпасаў на Данбас.
Прэзентацыя дакладу маніторынгавай місіі ААН па правах чалавека пра сітуацыю ва Украіне прайшла 8 верасня ў Жэневе.
Баявыя дзеянні на Данбасе працягваюцца з красавіка 2014 года.
