Новага галоўнага трэнера футбольнай зборнай Беларусі сёлета не прызначаць
Новага галоўнага трэнера футбольнай зборнай Беларусі сёлета не прызначаць. Ён можа з'явіцца не раней за студзень 2017 года. Такое рашэнне прыняло кіраўніцтва Беларускай федэрацыі футбола. Пашыраны спіс кандыдатаў (як мяркуецца, у ім будуць беларускія трэнеры, у тым ліку і тыя, што працуюць за мяжой, і замежныя спецыялісты) з'явіцца да канца года, у студзені ён будзе скарочаны і пачнуцца перамовы, інфармуе прэс-служба БФФ.
Як вядома, пра датэрміновае скасаванне кантракту з галоўным трэнерам зборнай Аляксандрам Хацкевічам стала вядома 6 снежня. Ён працаваў на гэтай пасадзе са снежня 2014 года, кантракт быў разлічаны да лістапада 2017-га. Пасля таго, як беларуская зборная няўдала выступіла ў першых матчах адбору на чэмпіянат свету 2018 года, Хацкевічу паведамілі пра планы змяншэння яго заробку, з чым ён не пагадзіўся.
