Пасол Нямеччыны: Еўрасаюз гатовы пачаць адносіны з Беларуссю з чыстага аркуша
Прыпыняючы санкцыі супраць беларускіх чыноўнікаў і шэрагу прадпрыемстваў, Еўрасаюз паказвае, што гатовы пачаць будаваць адносіны з Беларуссю з чыстага аркуша. Пра гэта заявіў амбасадар Нямеччыны Петэр Дэтмар 18 лістапада на канферэнцыі "Выхад на новыя рынкі". Яна праходзіць у Мінску ў рамках Сусветнага тыдня прадпрымальніцтва.
На думку дыпламата, якую перадае БелаПАН, эканамічныя праблемы Беларусі апошніх гадоў звязаныя больш з палітычнымі рашэннямі, якія прымаюцца ў краіне, чым з дзеяннем еўрапейскіх санкцый.
Амбасадар кажа, што прыпыненне санкцый — гэта відавочны сігнал Еўрасаюза, што ён "гатовы заплюшчыць вочы на падзеі ў Беларусі папярэдніх гадоў і гатовы надаваць увагу таму, што можа быць у будучыні".
Дарэчы, амбасадар Вялікабрытаніі Брус Бакнел удакладніў, што ЕС ўводзіў санкцыі не супраць Беларусі як дзяржавы, а супраць пэўных людзей.
Нагадаем, што 29 кастрычніка Еўрасаюз на чатыры месяцы прыпыніў дзеянне санкцыяў супраць прадстаўнікоў Беларусі. Замарозка санкцыяў закранула 170 фізічных асобаў, а таксама тры прадпрыемствы Беларусі. Пад санкцыямі засталіся чатыры чалавекі, якіх Еўрасаюз падазрае ў датычнасці да палітычных знікненняў у Беларусі — Уладзімір Навумаў, Віктар Шэйман, Дзмітрый Паўлічэнка і Юрый Сівакоў.
Фота: БелаПАН
