Прысуд журналістцы Вользе Радзівонавай вынеслі за публікацыі ў нямецкай прэсе

Сталі вядомыя падрабязнасці справы журналісткі Вольгі Радзівонавай, асуджанай на чатыры гады калоніі агульнага рэжыму.

Як паведамляе Генпракуратура, Вольгу асудзілі за артыкулы ў нямецкай газеце Die Tageszeitung, дзе яна апісвала сітуацыю ў Беларусі. Паводле версіі абвінавачвання, у артыкулах былі "выказванні, накіраваныя на ўзбуджэнне нацыянальнай і сацыяльнай варожасці і варожасці, дыскрэдытацыю рэспублікі, а таксама паклёп і абразы ў дачыненні да кіраўніка дзяржавы".

Журналістку абвінавацілі па чатырох артыкулах Крымінальнага кодэкса — паклёп і абраза Лукашэнкі, дыскрэдытацыя Беларусі і распальванне сацыяльнай варожасці.

Ёй прысудзілі штраф у 4000 рублёў і спагналі даход, атрыманы ад публікацый.

Праваабаронцы прызналі Вольгу Радзівонаву палітзняволенай.

Як паведамлялася раней, затрымалі журналістку ў сакавіку 2024 года. Да 2020-га Радзівонава працавала ў KYKY.org, а таксама супрацоўнічала як фрылансерка з беларускімі і замежнымі медыя.

На волі ў Вольгі засталася хворая маці, якой патрэбы пастаянны догляд — жанчыне ўжо больш за 80 гадоў.