Перад тым, як засесці за новы матэрыял, Re1ikt адыграе на біс альбом “Kufar”
“Перад тым, як грунтоўна засесці за новы матэрыял, працягваем традыцыю граць праграму на біс ― не так шмат нагод існуе, каб выканаць цалкам альбом. Многія з трэкаў даволі складана выканаць жыўцом, таму для нас гэта добры выклік. А для нашых слухачоў добрая магчымасць паслухаць песні, якія мы вельмі рэдка граем на канцэртах”, ― кажа лідар гурта Re1ikt, бубнач Аляксандр Дземідзенка.
Прэзентацыя дыска з аншлагам прайшла ў сталічным клубе “Бруге” ўзімку. Па выніках мінулага года “Kufar” трапіў у топ-10 вялікага журы партала Experty.by. Адным са сваіх любімых альбомаў яго назваў амерыканскі тэлевядучы Мэт О’Донэл.
Альбом “Kufar” запісваўся ў Польшчы паралельна з лепшым беларускім рок-альбомам 2015 года “Лекавыя травы” (па версіі прэміі Еўрарадыё "Даём рады") і атрымаўся такім жа лірычным і атмасферным. У яго ўвайшлi і шматлікія бонус-трэкі “незвычайнага” Re1ikt, які заўсёды эксперыментуе (напрыклад, стадыённы хіт “Разам” ― гімн футбольнага клуба “Крумкачы”, а таксама джаз-рокавы дуэт “Толькі снег” з саксафаністам “Крамбамбулі” Паўлам Аракелянам на словы Янкі Купалы).
Сродкі на выданне альбома, а таксама на здымкі кліпа на песню “Дробненькі дожджык” гурт сабраў па выніку паспяховай краўдфандынгавай кампаніі.
Апроч Мінска, Re1ikt прэзентаваў альбом “Kufar” і ў шэрагу беларускіх гарадоў. Цяпер музыкі “на біс” прадэманструюць размаіты матэрыял кружэлкі ў сталіцы, а таксама парадуюць слухачоў сваімі лепшымі кампазіцыямі і сюрпрызамі, якія пакуль трымаюць у таямніцы.
Канцэрт пройдзе 28 траўня ў TNT Rock Club (вул. Рэвалюцыйная, 9).
