Праграміста затрымалі пасля вяртання ў Беларусь і судзяць па 10 артыкулах

У Мінскім гарадскім судзе 20 верасня пачаўся працэс над праграмістам Максімам Мнацаканавым, пішуць праваабаронцы "Вясны". Судовы працэс вядзе Дзіна Кучук.

Яго вінавацяць адразу паводле дзесяці артыкулаў Крымінальнага кодэксу. Сярод іх — абраза прадстаўніка ўлады, абраза суддзі, удзел у экстрэмісцкім фармаванні, дзеянні, якія груба парушаюць грамадскі парадак, ды інш.

Па звестках праваабаронцаў, у віну Мнацаканаву ставяць 5-10 каментароў, якія ён пісаў цягам 2020-21 гадоў, калі быў ва Украіне. Сярод іх былі каментары на адрас суддзі Аляксандра Воўка, вядомага прысудамі па палітычных справах.

Праграміста затрымалі ў снежні 2022-га, калі ён вярнуўся ў Беларусь. Байцы ГУБАЗіКа пагражалі ўзламаць кватэру, калі Мнацаканаў не адчыніць ім дзверы.

Пасля затрымання яго ўнеслі ў "тэрарыстычны спіс". Паведамляецца, што ён павінен выплочваць крэдыт за кватэру, мае 10-гадовага сына.