Расія пакуль не мае намеру перадаваць Беларусі ядзерныя боезарады

Расія пакуль не мае намеру перадаваць Беларусі ядзерныя боезарады, а таксама ствараць на тэрыторыі нашай краіны аб'екты для іх захоўвання. Пра гэта гаворыцца ў адказе МЗС РФ, які атрымала выданне "Коммерсант". Журналісты папрасілі растлумачыць, што мелі на ўвазе Аляксандр Лукашэнка і прэзідэнт Расіі Уладзімір Пуцін, калі казалі аб падрыхтоўцы беларускіх лётчыкаў і пераабсталяванні беларускіх самалётаў "для магчымага прымянення боепрыпасаў паветранага базавання са спецыяльнай баявой часткай".

"На гэтым этапе гаворка ідзе выключна аб перадачы Рэспубліцы Беларусь комплексаў "Іскандэр-М" падвойнага абсталявання з ракетамі ў звычайным рыштунку, а таксама наданні часткі беларускіх самалётаў Су-25 тэхнічнай магчымасці несці ядзерную зброю", — патлумачылі ў МЗС. І ўдакладнілі, што самі "тэхналогіі па пераабсталяванні самалётаў у носьбіты ядзернай зброі перадаваць не плануецца".

Акрамя таго, цяпер "не мяркуецца ні фізічна абсталёўваць беларускія сістэмы ядзернымі боезарадамі, ні перамяшчаць такія боезарады на беларускую тэрыторыю". Не прадугледжана і стварэнне ў Беларусі аб'ектаў для захоўвання ядзерных боезарадаў. "Яны па-ранейшаму будуць сканцэнтраваны на цэнтральных складах у межах тэрыторыі Расіі", падрыхтоўка беларускіх вайскоўцаў таксама будзе ажыццяўляцца "у расійскіх навучальных цэнтрах па праграмах, якія выключаюць пытанні эксплуатацыі ядзерных боезарадаў", гаворыцца ў адказе расійскага МЗС.