Рассельгаснагляд: Наўрад ці разлікі з Беларуссю будуць у доларах

"Заявы Лукашэнкі і іншых беларускіх прадстаўнікоў аб тым, што нібыта ніякіх парушэнняў на прадпрыемствах харчпрама праверка не выявіла, не адпавядаюць рэчаіснасці", — такую заяву прэс-службы Рассельгаснагляду перадае ІА REGNUM.

Прэс-служба расійскага ведамства заявіла, што ёсць пэўныя правілы, якія дазваляюць ўводзіць абмежаванні ў мытную палітыку, калі таго патрабуюць абставіны, і гэта не супярэчыць заканадаўчай базе Мытнага саюза. Гэтак расійскі бок пракаментаваў заяву Аляксандра Лукашэнкі, што прадстаўнікі Рассельгаснагляду займаюцца самавольствам. Па словах расійскіх спецыялістаў, яны неаднаразова прапаноўвалі ўвесці сумесны кантроль і на прадпрыемствах, і на мяжы. Прапановы гэтыя беларускі бок, як паведамляецца, проста праігнараваў: "Беларускі бок проста займаецца дэмагогіяй, ёй выгадны нелегальны рээкспарт з краін Еўрасаюза".

Згадалі ў Рассельгаснаглядзе і мясную прадукцыю з геномам віруса АЧС. Па словах расійскіх спецыялістаў, усю інфармацыю пра заражаную вірусам АЧС прадукцыю на камбінатах ў Гродне, Гомелі і шэрагу іншых яны своечасова адправілі ў Мінск.

Асобна згадалі заяву віцэ-прэм'ера Беларусі Міхаіла Русага, што Беларусь і Расія нібыта дасягнулі дамоўленасці па разліках у доларах. Па словах прэс-службы Рассельгаснагляду, гэтыя звесткі "не зусім адпавядаюць рэчаіснасці. Расійскі бок толькі канстатаваў, што гатовы да дыялогу. Неабходна сумеснае абмеркаванне такіх намеры нашых партнёраў". Расійскія чыноўнікі лічаць ненармальным разлікі ў замежнай валюце паміж дзяржавамі, якія ўтвараюць адзіную мытную прастору. Яны сумняюцца, што будзе афіцыйная згода расійскага боку на такую меру.