"Белпошта" святкуе гадавіну нараджэння Кастуся Каліноўскага

Урачыстае гашэнне паштоўкі адбылося 2 лютага ў будынку Галоўпаштамта ў Мінску. Усе, хто набыў паштоўку ў гэты дзень, атрымалі магчымасць паставіць на яе адмысловы ўнікальны штамп.

Паштоўку выпусцілі накладам у 30 тысяч асобнікаў. Яна аздобленая карцінай мастака М.Рыжага. Яе выхад суправаджаўся невялікім скандалам. На навуковай канферэнцыі, прысвечанай гадавіне паўстання, галоўны рэдактар часопіса "Беларуская думка" Вадзім Гігін назваў ініцыятыву "Белпошты" "цемрашальствам чыноўнікаў".

Кастусь Каліноўскі (поўнае імя Вікенці Канстанцін Сямёнавіч Каліноўскі) нарадзіўся другога лютага 1838 года ў вёсцы Мастаўляны Гродзенскага павета, цяпер Падляскае ваяводства Польшчы. Рэвалюцыянер-дэмакрат, публіцыст, адзін з кіраўнікоў паўстання 1863-1864 гадоў на тэрыторыі сучасных Беларусі і Літвы.

У 1862-1863 гадах Кастусь Каліноўскі разам з аднадумцамі кіраваў выданнем і распасюдам нелегальнай рэвалюцыйнай газеты на беларускай мове "Мужыцкая праўда". 22 сакавіка 1864 года быў павешаны расійскімі салдатамі на Лукішскай плошчы ў Вільні.

Чытаць цалкамhttp://nn.by/?c=ar&i=103502