У мінскім метро прыбралі лавачкі з “Кастрычніцкай” і “Плошчы Якуба Коласа”
Але гэта было зроблена яшчэ да заяваў кіраўніка Беларусі — перад адкрыццём “Кастрычніцкай” 14 красавіка
З двух станцыяў мінскага метро — “Кастрычніцкай” і “Плошчы Якуба Коласа” — пасля тэракта 4/11 прыбралі лавачкі.
Пра гэта Еўрарадыё паведаміў намеснік начальніка мінскага метрапалітэна Алег Круглоў.
Алег Круглоў:”Мы ўжо прыбралі з двух станцый лавачкі. Гэта было перад адкрыццём станцыі ”Кастрычніцкая”. Мы прыбралі на станцыі “Кастрычніцкая” і “Плошча Якуба Коласа”.
Пра тое, што лавачкі ў метро непатрэбныя, 16 красавіка заявіў журналістам Аляксандр Лукашэнка. “Хіба метро для таго, каб прыйсці і адпачыць? Цягнікі там ходзяць літаральна праз некалькі хвілінаў, 2-3 ў гадзіны пік. Ну навошта? Заўжды праглядаецца натоўп. Няма лавачкі — стаіць сумка, пакет, імгненна звернуць увагу”, — сказаў кіраўнік краіны. Цікава, што з “Кастрычніцкай” і “Плошчы Якуба Коласа” лавачкі зніклі яшчэ да гэтай заявы.
Алег Круглоў дадаў, што лавачкі ў метро прадугледжваліся праектам, то бок будаваліся першапачаткова разам з метро.
Ці будуць прыбіраць лавачкі з іншых станцый — пакуль невядома.
Фота:skyscrapercity.com
