Страцілі рынкі — кіраўніца "Беллегпрама" расказала пра наступствы санкцый
Ад страты еўрапейскага рынку сур'ёзна пацярпеў Аршанскі льнакамбінат / ogak.by
Праз вайну і санкцыі некаторыя беларускія прадпрыемствы "Беллегпрама" страцілі высокапрыбытковыя рынкі. Пра гэта расказала на прэс-канферэнцыі ў Нацыянальным прэс-цэнтры старшыня профільнага канцэрна Таццяна Лугіна, піша Reform.by. Высокамаржынальнымі, паводле яе слоў, былі "рынак Украіны і Еўрасаюза і нават той жа Амерыкі з Канадай". Самым прыбытковым быў рынак Украіны.
Многія прадпрыемствы здолелі пераарыентавацца на Расію. Але як мінімум у трох застаюцца праблемы. Гэта "Аршанскі льнакамбінат", "Віцебскія дываны" і "Добрушскі парцалянавы завод". Яны пастаўлялі сваю прадукцыю пераважна на еўрапейскі рынак. Са слоў Лугінай, некаторыя прадпрыемствы ўсё яшчэ прадаўжаюць пастаўляць прадукцыю ў Еўропу — праз Турцыю. Што тычыцца паставак для прадпрыемстваў неабходных для вытворчасці імпартных сродкаў, то ёсць складанасці з хімікатамі, фарбавальнікамі, апрацоўчымі рэчывамі. Большую частку давялося замяніць — на турэцкія і індыйскія.
Лугіна таксама расказала, што сёлета канцэрн плануе паставіць прадукцыі на экспарт на 2 млрд долараў.
